Янги чеклов: Россияга юборилган халқаро пул ўтказмалари фақат рублда берилади Россия Марказий банки валюта чекловлари киритишдан тўхтагани йўқ, чунки валюта бозорининг торайтиришга қанча ҳаракат қилинмасин, рубль курсини мувозанатлашга уринишлар, барибир натижа бераётгани йўқ. Бугундан кучга кирган янги чекловларга кўра Россияга хориждан юборилган валюта маблағлари рус банклари томонидан фақат рублда берилади. Бунда маблағлар банк курси бўйича рублга ўтказилади, шу билан бирга бериладиган сумма Марказий банк курси билан ҳисобланган суммадан кам бўлмаслиги керак. Масалан, Ўзбекистондан Россияга 1000 доллар юбордингиз дейлик, банк сизга энг камида 116751,70 рубль беради, чунки бугунга Марказий банк курси 1 доллар учун 116,7517 рубль. Мазкур талаблар ҳисобварақ очмасдан амалга оширилган ўтказмаларга ҳам, электрон ҳамёнлар орқали ўтказмаларга ҳам таалуқли. Регуляторнинг мазкур янги талаблари Россияга пул ўтказмаларини деярли ўлдиради, фойдаланувчилар нақд валюта ташиш каби экстремал ва унчалик қонуний бўлмаган воситалардан фойдаланишни бошлайдилар. Очиғини айтганда, Россия Марказий банки хорижликлар Россияга нақд валюта ташиб келишларини истамоқда. Айтгандай, ўтган галги барча чекловларда бўлгани каби, бу сафарги чекловлар ҳам яна қоқ ярим тунда эълон қилинди. @the_bakiroo