Ёшлигида «келажакда ким бўлмоқчисан» деган саволга хавфсизлик хизматида, ҳарбий соҳада, прокуратурада ёки шунга ўхшаш касблардан бирида ишлаш орзусини айтган болакай бунинг учун ҳаракат қилиши, илм олиши етарли бўлмасди. Яқин вақтларгача шундай эди. Сен қайсидир муҳим структураларда хизмат қилишинг учун фақат билим, малаканг етарли бўлмасди. Сенга мутлақо боғлаб бўлмаган, шартли айтганда амакинг бир неча йиллар олдин судланган/қамалган бўлса, тамом. Сен учун орзуингдаги барча эшиклар ёпиларди. Малаканг, билиминг, жисмоний имкониятларинг қизиқ эмас, чунки қариндошинг судланган. Сўнгги йилларда мана шу мантиқсиз ўзига хос тизимга барҳам берилди. Фуқаро қариндошининг қилган иши учун жавоб бермайдиган бўлди. Мантиқан ҳам бу энг тўғри йўл — сенга умуман дахлдор бўлмаган иш учун, сен келажагинг билан жавоб бермаслигинг керак. Конституцияни ўзгартириш лойиҳасида “Шахснинг судланганлиги ва ундан келиб чиқадиган ҳуқуқий оқибатлар унинг қариндошлари ҳуқуқларини чеклашга асос бўлиши мумкин эмас” деган норма қатъий ёзиб қўйилиши режалаштирилмоқда. Мантиқий қарор. Биз юқорида эслаган бола қариндошларининг қилмишларига қараб орзу қилмаслиги керак.