Яхши янгилик: Тожикистон Марказий Осиё ягона энерготизимига қайтмоқчи Тошкентда Шанхай Ҳамкорлик Ташкилоти давлатлари энергетика вазирлари саммитида иштирок этган Тожикистон энергетика ва сув ресурслари вазири Далер Жума шундай баёнот берган. Жуманинг айтишича, умумий тармоққа 500 кВлик учта ва 220 кВлик икки линия уланади. Тожикистоннинг Марказий Осиё ягона энерготизимига қайта уланиши 2023 йилда якунланади. 1960- йилларда шаклланган Марказий Осиё ягона энерготармоғи мустақиллик йиллари баъзида техник ва энергетик муаммолар, аксариятида эса сиёсий сабаблар туфайли дарз кета бошлаган. Ягона энерготармоқни 2003 йилда Туркманистон тарк этган. Ҳозир бу мамлакат энергетикаси Эрон билан параллел тармоқда ишлайди. Тожикистон эса 2007 йилнинг совуқ қишидан кейин тармоқдан узилган. Реалликда турли танаффуслар билан ягона Марказий осиё тармоғини Ўзбекистон, Қозоғистон ва Қирғизистон энергия қувватлари бирлаштириб туради. Тожикистоннинг Марказий Осиё ягона энерготармоғига қайтиши энг аввало энергияга талаб шиддат билан ўсиб бораётган Ўзбекистон учун фойдали. Миллий генерациянинг ўсиши билан биргаликда муқобил ташқи манбаларга эга бўлиш ҳамиша манфаатли. Айнан умумий энергетика бозорига интилишлар Европа иттифоқининг пайдо бўлишига туртки бўлганди. Ким билади дейсиз, балки Марказий осиёнинг қайта интеграциясини айнан энергетиклар бошлаб берар.