"Ғалла коридори" битимларининг имзоланиши буғдой нархларини тўрт ойлик минимумларгача арзонлаштирди Бугун Истамбулда бир тарафдан Украина, БМТ ва Туркия, иккинчи тарафдан Россия, БМТ ва Туркия ўртасидаги келишувларнинг имзоланиши билан украин буғдойини босқинчи Россия тарафидан блокланган портлардан олиб чиқиш имконияти пайдо бўлмоқда. Битим Украинанинг Одесса, Южний ва Черноморск портларидан фуқаролик кемалари орқали ғалла ташишга имконият яратади. БМТ ва Туркия келишилган хавфсиз йўналишларда қурол-яроғ ташилмаслиги кафолатини олади. Ҳозирча келишув 120 кун давомида амал қилади. Кейин бу муддат яна узайтирилиши мумкин. Мазкур муҳим битимни ғалла бозори кўтаринки руҳда қабул қилди. Тўрт ой деганда биринчи марта буғдой нархлари 310 долларгача арзонлашди. Май ойининг максимумларида буғдой 450 долларгача қимматлаб кетганди.