Ташқи савдода Хитой ва Россияга қарамлик янада кучаймоқда Афсуски, агрессия ва сиёсий элитани коррупциялаштириш асосий қадрияти бўлган бу икки давлатнинг Ўзбекистонга иқтисодий таъсири шиддат билан юксалмоқда. 9 ой якунларига кўра, Хитой ва Россиянинг мамлакатимиз ташқи савдосидаги улуши 37%дан ошган, бу кўрсаткич йил бошида 35,6%, 2020 йил якуни бўйича эса 33,2% эди. Хитой ва Россияга қарамлик ошиши қўшниларимиз билан, Туркия билан савдо улуши пасайиб бораётгани шароитида юз бераётгани икки карра муаммо. Ўтган 1 йил давомида бевосита бешта қўшнимиз билан савдо улуши 17,6%дан 15,7%гача пасайган. Туркия билан савдо улуши эса 8,6%дан 6,8%гача қисқарган. Туркияга экспортимиз, Туркманистондан импортимиз жисмонан қисқараяпти. Ҳукумат ташқи савдо концентрациясини иқтисодий ва геосиёсий хавф ўлароқ кўришни истамаётган бўлиши мумкин. Чунки ташқи савдо диверсификацияси импортни эркинлаштиришни, протекционизмдан воз кечишни талаб этади. Айнан протекционизм нафақат ўзбекистонликларни камбағаллаштирмоқда, балки бизни янада кўпроқ шарқдаги ва шимолдаги гигант давлатларга боғлиқликни кучайтирмоқда.