Хусусий банкларга фақат чакана секторда "нон қолмоқда" Бутун формати бўйича давлатнинг мутлақ назорати ўрнатилган, барча пул оқимлари ва каналлари давлат ва бюджет манбаларига боғланган, яна қўшимчасига банк секторининг 80%дан зиёди ҳукуматга бўйсунадиган самарасиз давлат банклари "босиб олган" Ўзбекистонда хусусий банклар учун бир чеккадан - чакана сектордангина жой қолган. Ноябрь якунларига кўра 5та хусусий банкда чакана депозитлар қолдиғи корпоратив қолдиқлардан кўпроқни ташкил этади. Яна 6та хусусий банкда чакана депозит портфели 50%га яқинлашмоқда. Улар нима ҳам қилишсин, давлат банклари тарафидан бўлиб олинган, маъмурий топшириқлар асосида депозитлар тақсимланадиган корпоратив секторда нон йўқ. Буни ноябрь ойида депозит бозорида юз берган тенденциялар ҳам тасдиқлайди. Ўтган ойда депозитлар қолдиғи жами 10,0 трлн.сўмдан зиёдга ўсган бўлса, шундан 8,4 трлн.сўмлик қисми давлат ва бюджет каналларидан оқиб келадиган корпоратив секторга тегишли. Ва пулларни асосан давлат банклари Асакабанк (1,9 трлн.сўм) Ўзсаноатқурилишбанк (1,8 трлн.сўм) ва Миллий банк (1,6 трлн.сўм) эгаллааган. Шаклланаётган янги реалликларда банклар устидан, ресурсларнинг тақсимоти ва йўналтирилиши устидан маъмурий назорат янада кучаяди. Энг ёмон вариацияларда Ўзбекистон банк тизими ҳукумат агенти сифатида ишлайдиган "муллажоновча" моделга яна қайтади.