Депозитлар давлат банкларига қараб оқмоқда Йил якунига келиб фискал каналларнинг рағбати билан банкларда депозит қолдиқлари ўсиши мавсумий кузатиладиган ҳолат. Лекин бу йил корпоратив депозитлар ҳам, аҳоли омонатлари ҳам асосан давлат банкларига қараб оқмоқда. Ноябрь ойида банкларнинг жами депозитлари 13,4 трлн.сўмга ўсган ва қарийб 391,0 трлн.сўмга етган. Ўсишнинг 1,9 трлн.сўми аҳоли омонатларига, 11,5 трлн.сўми корпоратив депозитларга тўғри келади. Жами депозитларни ўстиришда Миллий банк (+2,4 трлн.сўм), Асакабанк (+2,2 трлн.сўм) ва Ўзсаноатқурилишбанк (+2,0 трлн.сўм) етакчи бўлишган. Агробанк (+725 млрд.сўм), Анорбанк (+380 млрд.сўм) ва Миллий банк (+355 млрд.сўм) аҳоли омонатларини жамғаришда фаол бўлишган. 12та банкда аҳоли омонатлари қолдиғи қисқариши кузатилган. Уларнинг орасида яқингача онлайн омонатлар жамғаришда мутлақ етакчи бўлган банклар ҳам бор. Очилганига кўп бўлмаган ва кичик банклар юқорироқ фоизлар таклиф қилиб, бозорда фаол бўлишга ва улушларини кенгайтиришга уринишмоқда.