Юқори фоизлар октябрда омонатларнинг ўсишини тиклаган Омонатлар бўйича фоиз ставкаларининг кўтарилиши банклардан аҳоли омонатлари қочишини тўхтатган. Сентябрда 1,9 трлн.сўмга қисқарган омонатлар, октябрда 860 млрд.сўмга ўсган ва 1 ноябрга қолдиғи 78,0 трлн.сўмга етган. Хусусий банклар орасида аҳоли омонатларининг энг катта ўсишини Анорбанк (+195 млрд.сўм) таъминлаган бўлса, давлат банклари орасида Агробанк (+220 млрд.сўм) ўта фаол бўлган. Корпоратив депозитларнинг ялпи қисқариши яна бошланган. Ой давомида корпоратив қолдиқ жами 2,2 трлн.сўмга қисқарган ва 142,0 трлн.сўм даражасида қолмоқда (катта эҳтимол, корпоратив қолдиқ йил якунигача қолган даврда ўтган йилги 153,6 трлн.сўмлик даражага чиқмайди). Корпоратив депозит бозорининг торайиши фаоллашган импорт учун конвертация ва фискал каналнинг тийиб турилгани билан боғлиқ бўлиб қолмоқда.