Сентябрда омонатлар қолдиғи қисқарган Сентябрь ойи давомида тижорат банкларидаги аҳоли омонатлари қолдиғи 1,9 трлн.сўмга қисқарган ва 1 октябрь ҳолатига 77,2 трлн.сўмни ташкил этмоқда. Шу билан бирга омонатларнинг давлат банкларидан хусусий банкларга кўчиб ўтиши ҳам тезлашган. Ой мобайнида давлат банкларидаги омонатлар 2,3 трлн.сўмга қисқарган бўлса, хусусий банкларда 411,0 млрд.сўмга ошган. Кузатилаётган жараён валюта курси ўзгариши хавотирлари, шунингдек, қатор хусусий банклар эҳтимолий курс ўзгариши фарқини ҳам қоплайдиган шартларда жозибали омонатлар таклиф этишда давом этаётгани билан боғлиқ бўлиши мумкин. Хусусий банкларда сентябрда энг кўп омонат қолдиғини ўстиришга Капиталбанк (+291,0 млрд.сўм), Анорбанк (+154,0 млрд.сўм) ва ТВС банк (+84,0 млрд.сўм) эришган. Яна бир омил учинчи ой кетма-кет давлат банкларига корпоратив депозитлар оқими юқори даражада қолаётгани билан боғлиқ. Яъни давлат банкларига ҳозирча нархи қиммат бўлган омонатлар қизиқ эмасдек. Қайд этиш зарурки, банклардаги жами корпоратив депозитлар учинчи ойдирки фаол ўсиб келмоқда, сентябрдаги ўсиш 2,8 трлн.сўмни ташкил этган ва қолдиғи 144,0 трлн.сўмга етган (лекин йил бошидаги 153,6 трлн.сўмлик кўрсаткичга ҳалиям етмаган).