Депозитор ва омонатчилар сентябрь ойида ҳам Туркистонбанкка пул қўйишда давом этишган Жуда қизиқ. Очиқ маълумотлар кўра Туркистонбанкнинг муаммоли кредит портфели 90%дан ортгани, капитал ва ликвидлик билан боғлиқ пруденциал талабларни муттасил бажармай келганига қарамай, депозитор ва омонатчилар банк ёпиладиган охирги муддатгача пул қўйиб келишган. Сентябрда Туркистонбанкнинг чакана омонатлари қолдиғи 11 млрд.сўмга, корпоратив омонатлар қолдиғи 13 млрд.сўмга ўсган. Буни молиявий саводхонлик йўқлиги билан изоҳлаш жуда қийин, катта эҳтимол, депозитор ва омонатчилар катта фоизли даромадлар ортидан қувишда давом этишган. Умуман олганда, сентябрда банк тизими бўйича ниҳоят депозитлар қолдиғининг ўсиши 0,5%гача секинлашган, курс фарқи эффекти ҳисобга олинса эса деярли тўхтаган. Аҳоли омонатлари жами қолдиғи март ойидан бери биринчи марта қисқарган (-709 млрд.сўм). Сентябрда депозитларнинг энг катта қисқариши Миллий банкда кузатилган (-5,3 трлн.сўм). Буни импортни молиялаштириш учун катта миқдорда конвертация ва тўлов ёки йирик қолдиқларни бошқа давлат банкига ўтказилиши билангина изоҳлаш мумкин. Энг катта ўсиш эса Ипотекабанкда (+4,4 млрд.сўм). Хусусий банклар орасида энг катта ўсишга ОФБ эришган (+1,9 трлн.сўм). ОФБ бу борада узоқ вақтдан бери депозит жамғаришда илғорлик қилиб келаётган Капиталбанкни ҳам ортда қолдирган (+764 млрд.сўм). Ахборот маконида тўсатдан шакллантирилган негатив фонга қарамай, онлайн банклардан Анорбанк депозит портфелини 183 млрд.сўмга, ТВС банк эса 70 млрд.сўмга кўпайтира олган.