Афтидан, фақат Ўзбекистонда «янги метро объектлари қурилишининг техник томони билан боғлиқ» тадбирлар «режалаштирилмаган» тарзда ўтказилиши мумкин. Қанақа бўлади у? Қурувчи сигарет чекиб турганида: «Эҳ, мана бу жойини мана бундоқ қилиб кўтарсак бўларкан... Оғайнилар, келинглар, шу жойини ўзгартирайлик, Холмат, тепадагиларга айт, метро юрмай турсин икки соат», — шунақами? Ҳарбийларнинг қандайдир ўқув машғулотлари юқоридан берилган кутилмаган тревога билан ўтказилишини билардим, шунингдек, эҳтимолий терактлар ҳам расмийлар учун кутилмаган, режалаштирилмаган тадбир ҳисобланади (лекин техник тадбир дейилмаса керак шунда ҳам). Бироқ, «қурилишнинг техник томони билан боғлиқ режалаштирилмаган тадбир» қандай бўлади, бунисини билмадим. Яна бирор жойда тупроқ ўпирилиб тушганмикин? Ё ерости сувлари отилиб чиқдимикин? Унда бу «режалаштирилмаган техник тадбир» эмас, фавқулодда ҳолат бўлади, адашмасам. Мантиғи ҳам қизиқ буларнинг — «режалаштирилмаган техник тадбир»ининг тафсилотини айтолмаганлар, йўловчиларни олдиндан огоҳлантиролмаганлар эмас, балки «нима бўляпти ўзи?», деб савол берганлар «аҳоли орасида ғулғула» келтириб чиқарармиш. Бу давлат органлари халққа ақл ўргатишни қачон бас қиларкин? Давлат органи, давлат компанияси, сенинг вазифанг — қилаётган ишинг ҳақида аҳолига батафсил ахборот бериш, нимани қандай қилишни ўргатиш эмас. Ана, Марказий банкка ўхшаб қилаётган ва қилмаётган ишларингни зўр қилиб кўрсатиб, тушунтириб бергин, биров сенга бир грамм ҳам ортиқча савол бермайди, гапирмайди ҳам. Раҳмат, дейди керак бўлса.