Бизнес рискка бормай қўйган Ўтган бир йил давомида бизнеснинг кредит мажбуриятлари қолдиғи 14%га ўсган. Девальвация даражаси, инфляция суръати ва реструктуризация эффекти ҳисобга олинса, бизнес кредит мажбуриятларини ўстиришдан тийила бошлаган. Давлат назоратидаги самарасиз, фақат пул ўзлаштиришни кўзда тутган ва зарарли лойиҳалар молиялаштирилишда давом этмоқда. Лекин рақобатли бозорда фаолият кўрсатувчи бизнес учун янги мажбуриятлар асосан қайта молиялаштириш билан боғлиқ бўлиб қолган. Январдаги кризисдан кейин февралда бизнеснинг кредит қолдиғи бироз ўсгандек (+3,6 трлн.сўм ёки 1,2%). Лекин инобатга олиш лозимки, айнан февралда аномал совуқдан зиён кўрган бизнес учун кредитлар реструктуризация қилинди, бунга валютадаги кредитларнинг тани курс ҳисобига ўсганини ҳам қўшиш керак. Чакана секторда эса вазият анча ижобий. Ипотека кредити ажратиш яна тезлаша бошлаган, микроқарз, истеъмол кредити каби бошқа тижорий маҳсулотларни молиялаштириш ҳам яна аввалги суръатга қайтган. Хурсанд қиладигани, оилавий тадбиркорликка ажратилган кредитлар қолдиғи, мазкур паразит лойиҳа бошлангандаг буён биринчи марта ўсмаган, камайган. Балки бу жуда катта миқдордаги имтиёзли кредитлар "списать" қилингани билан ҳам боғлиқ бўлиши мумкин. Муаммоли кредитлар ((NPL) 140 млрд.сўмга кўпайган ва 15 трлн.сўмдан ошган, портфелдаги улушда эса ўзгармаган (3,8%).