Турган битгани зиён! Оилавий тадбиркорлик учун ажратилган кредитлар бўйича NPL 18%га етган бўлиши мумкин Биринчи чорак якунлари бўйича чакана кредитларнинг муаммолилик даражаси 3,6% атрофида бўлган. Марказий банк қисман ёпиқлик анъанасига содиқ қолиб, яна оилавий тадбиркорликка ажратилган кредитлар бўйича муаммоли кредитлар улуши ва ҳажмини алоҳида кўрсатмаган. Лекин биргина номаълуми қолгани туфайли бу тенгламани ечса бўлади. Демак, ипотека (810 млрд.сўм), микроқарзлар (311 млрд.сўм) ва истеъмол кредитларнинг негизи автокредитлар (152 млрд.сўм) бўйича муаммоли кредитлар чегириб ташланса, оилавий тадбиркорлик учун ажратилган кредитларнинг қарийб 2,7 трлн.сўми ёки 18%дан ортиғи муаммоли бўлиши мумкин. Йил бошида бу кўрсаткич 16% атрофида эди. 2017 йилдан кейинги даврда банкларда Зараркунандаликнинг рамзига айланган мазкур имтиёзли кредитларнинг қанча қисми "списать" қилингани ҳам расман очиқланмайди. 2023 йилдан оилавий тадбиркорликка ажратилган ва "списать" қилинган илк кредитларнинг балансдан ташқаридаги ҳисобварақлардан ҳам ўчирилиши бошланади. Яъни якунда ҳеч қандай из қолмайди.