Федерал захира тизими сиесатчиларнинг чақириқларига қарамай, базавий ставкани яна оширди Қўшма штатлар федерал захира тизимининг кеча тунда бўлиб ўтган йиғилиши банк секторига нисбатан саволлар кўпайиб бораётган, хусусан учта йирик банкнинг банкротлиги, рецессия хавотирлари кучайиб бораётгани шароитида ўтказилди. Йиғилишдан бироз аввал Конгресснинг демократлардан иборат вакиллари ФЗТга ставкани оширишни тўхтатишга чақирган эди. Мураккаб вазият ва босимларга қарамай ФЗТ ставкани кетма-кет ўнинчи қадамда ҳам 0,25 фоиз бандига 5,00-5,25%гача оширди. Бу 2007 йилдан бери тизим қўллаган энг баланд ставка ҳисобланади. ФЗТ ўзининг баёнотида инфляция ҳалиям баланд даражада эканлиги уқтирилиб, уни таргетдаги 2% коридорига қайтариш асосий вазифа эканини қайд этган. Бундан буён ФЗТ қабул қилинган қарор ва қадамларнинг натижаларини кузатиш ва кутиш босқичига ўтиши мумкинлиги айтилмоқда.