​Валютадаги кредитлар ставкаси юқори суръатда кўтарилмоқда Хорижий валютадаги кредитларнинг ўртача ставкаси 8,9%га етган. Бу ўтган ойга нисбатан 0,8%, ўтган йилга нисбатан 2,7%га қимматроқ дегани. Хорижий валютада ставкаларнинг ошиши асосий экономикаларда қаттиқлаштириш сиесати давом этаётгани, қарз жалб қилиш қимматлашаётгани, яқин истиқболда ставкаларнинг тушиши кутилмалари мавжуд эмаслиги билан боғлиқ. Қизиқ тарафи, кредитлар бўйича ставкалар кескин ошаётганига қарамай, валютадаги депозитлар ўртача нархида катта ўзгаришлар деярли йўқ. Март якунлари бўйича валютадаги депозитларнинг ўртача ставкаси аҳоли омонатлари бўйича 4,2%ни (-0,1%), бизнес депозитлари бўйича эса 3,2%ни (+0,2%) ташкил этган холос. Бу биринчидан, банкларнинг валютадаги кредитлари молиялаштириш манбалари кўпроқ хорижий қарзларга боғлиқлиги билан бўлса, иккинчи тарафдан, депозитлар бўйича эластиклик ортда қолаетганини кўрсатади. Ҳақиқат учун айтиш керакки, банклар апрель ойидан бошлаб 6 ва 7 фоизлик депозит маҳсулотларини таклиф эта бошлашди. Шунга қарамай, валюта курсининг барқарорлиги шароитида 20 ва ундан юқори фоиз ставкадаги миллий валютадаги депозитлар нисбий афзаллигини сақлаб қолмоқда.