Энг асосий урғу мактабга оид: йилига мингтагача мактаб қурилиши мумкин Танланган спарринг рақиблар алаҳсирашда ва электоратни олабўжи бўлиб қўрқитишда давом этаётган вақтда соғлом ақлга мурожаатни асосий номзоднинг дастуридан излашдан ўзга чора қолмайди. Демак, бугун янграган баёнотларга таянилса, "Йилига 500 минг ўқувчи ўрни" дастури амалга оширилади, 2030 йилга қадар мактабларда 2,5 млн.та қўшимча ўқувчи ўрни яратилади. Агар янги мактаб бинолари асосан мавжуд қувватларни кенгайтириш воситасида амалга оширилаётгани ҳисобга олинса, йилига ўртача мингта янги мактаб биноси қурилиши ҳақида гап кетаётган бўлиши мумкин. Мактабни имконли қилиш ва тенгсизлик яратаётган адолатсизни енгишда бу жуда катта қадам бўлади. Агар йўл йўлакай кампаниябозлик билан боғлиқ хатоларга йўл қўйилмаса, урбанизация ошаётгани, бугун туғилаётган болалар эртага асосан катта ёки кичик шаҳарлардаги мактабларда ўқиши инобатга олинса, 2030 йил эмас, 2028 йилга бориб мактаб етишмовчилиги муаммоси ҳал этилиши мумкин. Яна бир хурсанд қиладигани, бугунги баёнотларда бепул нонушта билан боғлиқ аввалроқ коррупцион лобби таъсирида шаклланган тезисларнинг қайта янграмагани бўлди.