​Туркия иқтисодиётини соғломлаштириш йўлида биринчи қадам қўйилди Учинчи муддатга қайта сайланган Эрдоган кеча оқшом янги ҳукумат таркибини эълон қилди. Бунда аввалроқ музокаралар вақтидаёқ анонс қилинган ва кутилган муҳим воқеа рўй берди: Меҳмет Шимшек Молия ва Ғазна вазири лавозимига қайтди. Шимшек 2009 йилдан 2015 йилга қадар Эрдоган ҳукумати учун Молия вазири сифатида ишлаган ва очиқ бозор қоидаларига таянган иқтисодий ва молиявий сиёсатни олиб борган. Шу маънода кўпчилик экспертлар Эрдоганомика номи билан аталадиган иқтисодий сиёсатда туб ўзгаришлар бошланишига умид қилишмоқда. Лекин бу фақат биринчи қадам холос, истиқбол Шимшекка қанчалик автоном қарор қилиш ваколатлари берилгани ва яна бир бўғин — Марказий банкка мустақиллик билан бирга соғлом қарор қабул қилувчи шахсларнинг қайтарилишига ҳам оид бўлади. Шахсан мен Шимшекнинг Эрдоган кабинетида узоқ қола олишига умидим катта эмас. Энг оғир, ёқимсиз ва обрў келтирмайдиган қарорлар унинг қўли билан амалга ошириб олингач, эски риторикага қайтиш эҳтимолини истисно қилиш жудаям қийин. Эсда тутиш лозимки, эртадан бошлабоқ, фоиз сиёсати қаттиқлаштирилиши, банклараро валюта бозорига чекловлар олиб ташланиши, иқтисодий қарорларда непотизмдан воз кечилиши рўй бериб қолмади. Лекин бозорлар позитив сигналлардан қисқа муддатларга рағбат олишни бошлаши аниқ.