Қонун бузилишини тарғиб қилиш оддий ҳолга айланди Охирги вақтларда ижтимоий тармоқларда бир тенденция оммалашиб бораётгани кўнгилни хира қиляпти: машҳур, номи чиққан блогер ёки жамоатчилик фаоллари кўпхотинликни нормал ҳолат сифатида тарғиб қилмоқда ва бу ҳолат фақат кўпайиб бормоқда. Биринчи навбатда қонун бузилиши бўлган бу ҳолатга зиёлилар, ҳуқуқшунослар, умуман олганда бошқа фаоллар ҳам томошабин бўлиб тургандек. Қарши муносабатларни кўрмайсиз. Кимдир қимматбаҳо совғаларни “1-хотинимга” ва “2-хотинимга” сўзли тасмалар билан безаб, жамоатчиликка кўз-кўз қилиш орқали кўпхотинлиликни тарғиб қиляпти. Ҳаттоки ўз турмуш ўртоғига гўёки янги хотин совға қилиб, бу тарғибот орқасидан ҳайп ишлашни мақсад қилганларни ҳам кўрдик. Жамоатчиликнинг бошқа қисми эса бунга жимгина қараб туриш орқали жамиятда нотўғри таълимот, қадрият “урф”га айланишига ҳисса қўшаётганидан бехабар. Бизда зарарли маҳсулотлар, масалан, тамаки, спиртли ичимликлар рекламаси тақиқланган. Лекин инсон онги, дунёқараши ва тақдирига зарар етказиши мумкин бўлган одатлар ва ҳаракатлар тарғиботи ҳаммасиданда зарарли эканлигини ўйлаб ҳам кўрмаймиз. Қонунчилик билан тақиқланган ҳатти-ҳаракат ёки фаолиятнинг тарғиб қилинишига нисбатан чора кўриш вақти келди, шундай бўлиши керак, жазо муқаррарлиги таъминланиши шарт, агар бунинг учун қандайдир ўзгаришлар керак бўлса, қонунларимизга ўзгартириш киритиш керак. Ҳар қандай қонунчиликка зид шаклланган урфларни фақатгина жазо муқаррарлиги билан енгиш мумкин.