Сталинистлар ҳақида Мен тескари ижтимоий лифт туфайли тепага чиқиб олган, 20, 30, 40 йил аввалги штамплар билан яшаш ва ишлашда давом этаётган, энг катта фазилати қўрқоқлик ва лаганбардорлик бўлган паразитларни Сталиннинг генералларига ўхшатаман. Блиндажда, бункерда ўтирволиб буйруқ бераверади, фронтда аслида нима бўлаяпти, қанча йўқотишлар бор, унинг янги тентакона буйруғи яна қанча йўқотишга олиб келади, уларга фарқсиз. Дарвоқе, улар ростанам феълан ёки очиқчасига Сталинист. Мақсад йўлида ҳар қандай ва ҳар қанча қурбонни оқлайди. Рус халқининг қассоби бўлган Жуков 75 йил аввал Берлинга биринчи бўлиб кириб бориш мақсадида Зееловск тепаликларини эгаллашга қарор қилади ва 23 кунлик операция давомида 361 367 аскарни қурбон беради. Бу кунига 15712 қурбон дегани. Қизил армия ҳатто Москва остонасидаги жангларда ҳам кунига 10910тадан қурбон берган. Берлинга бир неча км қолганда эса кунига 1.5 баробар кўп қурбон. Берлинга 1 майда эмас, 15 майда кириб борса бўлармиди? Капитуляция 8 майда эмас, 25 июнда юз бериши мумкинмиди? Албатта мумкин эди. Камроқ қурбон бўларди, камроқ талафот бўларди, камроқ немис аёллари ва болалари ўлдирилган ва зўрланган бўларди. Лекин унда Жуков Сталиндан мақтов ва олқиш эшитмасди. Хўш, Жуков қаҳрамонми? Йўқ, Жуков қассоб ва жаллод. Мана шунақа. Биздаям ҳозиргача ўзини Жуков деб билганлар жуда-жуда сероб. Улар турли соҳаларда, хусусан, коронавирус фронтида ҳам стратегияни белгилашаяпти, мажлислар қилиб, гўёки вазиятни қўлларига олишда давом этишмоқда. @the_bakiroo