Тарози босадиган кун Бизнес йўқотишлардан қўрқиб овоз чиқармаган, истеъмолчилар эса фикрда тарқоқлиги шароитида, бозор ечимларидан кўра популистик қарорлар оммабоп бўлган 2017 йилдан кейинги даврда Ўзбекистонда айнан Марказий банк бозорнинг энг катта ҳимоячиси ўлароқ гавдаланиб келган ва бизни бунга кўниктириб ҳам бўлган. Кеча тушдан кейин ва бугун тушгача рўй берган воқеликлар якуни Ўзбекистонда Марказий банкдан ташқарида ҳам бозорни ва бозор қадриятини ҳимоя қила оладиган қатлам шакллана бошлаганини кўрсатди. Эски бизнесменлар, янги иқтисодиет яратаётган креатив синф, ОАВ, медиа, талабалар ва умуман базавий иқтисодий маълумотга эга ўзбекистонликлар чекловлар шаклини оладиган қоидалар, айниқса, бу ўзгартиришлар шошилинч, ёпиқ ва муҳокамасиз тарзда қабул қилинса қандай оқибатлар яратишини ўта ёмон оғриқлар қолдирган ўтмишга нисбатан экстраполяция қилиб кўрдилар. Айни пайтда консенсус шуки, муаммолар мавжуд, уни кўпчилик кўриб, билиб, сезиб турипти. Лекин бу муаммолар ечими бозорга суянган ҳолда ва умум қабул қилинган қоидалар доирасида топилиши керак. Импорт воситасида капитални четга олиб чиқиб кетиш муаммоси борми? Бор. Нафақат Ўзбекистонда, бутун ривожланаётган учинчи дунёнинг бош оғриғи бу. Глобал капитал бозоридаги конъюнктура ва тенденциялар ҳали яна кўп вақт мураккаблигича қолади. Бунга қарши узоқ муддатли ечимлар инвестицион муҳитни яхшилаш, таркибий ислоҳотлар ва қонун устуворлиги. Қисқа муддатли ечимлар эса коррупцион схема ва самарасиз лойиҳаларга қарши аёвсиз кураш, айбдорларни шафқатсизларча жазолаш ҳисобланади. Тан оламизми, йўқми, капитални олиб чиқиб кетиш муаммоси энг аввал давлат буюртмалари, давлат инвестициялари ва қарз ўзлаштириш лойиҳалари билан боғлиқ. Худди шунингдек, ташқи савдога оид санкцион комплаенс қоидалари заифлиги айтилаётган банклар муаммоси ҳам манзилли ҳал этилса бўлади. Битта тиррақи бузоқни деб эндигина ишонч яралаётган бутун бошли тизимни остин-устун қилишга боришдан ҳамма ютқазади. Ҳамма билади ўша икс банк ва ундан андоза олиб ишлаётган, хатарларни норационал қабул қилаётган ва жамлаетган банкларни. Айнан ўшаларга нисбатан муддатли, даврий, чекланган, алоҳида, кучайтирилган режимни қўллашга Марказий банк тўла ҳақли. Қонун унга изн беради. Бугун эшитганимиз яна муҳим мужда шу бўлдики, Марказий банк курсни прогноз қилмайди. Такрор бўлсаям айтилди, валюта курсини бозор, хусусан жуда кўп ташқи омиллар белгилайди. Шуни асло ва асло эсдан чиқармаслигимиз керак.