Кеча ўзи нима бўлди? Авваламбор, шахсан мен бу Марказий банкда қабул қилинган қарор деб ўйламайман. Чунки қонун бўйича мустақил Марказий банкда бундай қарорлар қабул қилиниши мумкин эмас, агар қабул қилинган бўлса, демак Марказий банк мустақиллигини бутунлай йўқотиб бўлган. Иккинчидан, биз кечаги қарор билан валюта бозорида де-юре Каримов режимига қайтдик. Банклар ва бизнес 18 сентябрдан амал қилиши лозим дейилаётган қоидалар Каримов имзолаган, ижроси Азимов ва Муллажоновга топширилган қарор ва унинг 2- иловасининг айнан ўзгинаси. Ҳатто ёмонроқ. Учинчидан, Каримов ўта легалист эди, ҳар бир ҳаракати ва чекловини, қанчалар абсурд бўлмасин, қонун ва қоидаларда акс эттирарди. Кечаги топшириқ (уни бошқача аташга тил бормайди) шу маънода ғирт нолегитим. Сиз, биз, ўзбекистонликлар, кечаги қоидаларни  акс эттирган бирон фармон, қарор ё ҳаттоки низомни кўрдикми? Йўқ. Ҳатто шу соатга қадар на ҳукумат, на Марказий банк икки оғиз баенот бера олгани йўқ. Бу янги топшириқлар белгилаган чекловларни жамоатчилик ва манфаатдор тарафлар билан муҳокама этишнику ҳатто ҳаелларигаям келтиришмаган. Тўртинчидан, биз токи ўзимизни ҳуқуқий давлат деб атаётган эканмиз, ҳеч қурса ўзимиз белгилаган қоидаларга ўзимиз амал қилишимиз зарур. Икки йил аввал қабул қилинган Президент қарорига кўра, тадбиркорлик фаолиятига, фуқароларнинг ҳуқуқлари, эркинликлари ва қонуний манфаатларига, шунингдек, атроф-муҳитга таъсир кўрсатувчи барча норматив-ҳуқуқий ҳужжатлар лойиҳалари ва қабул қилинган норматив-ҳуқуқий ҳужжатлар тартибга солиш таъсирини баҳолашдан ўтказилиши шарт. Марказий банк душанбадан ишимизга чеклов киритипти, деб қўйдек сарак-сарак қилиб қабул қилиб кетилавермайди. Бизнес ҳамжамият, Савдо-саноат палатаси, ташқи савдо вазирлиги, қуруқ фасадга айланиб қолган бўлсаям Парламент ўз сўзини айтиши керак. Бешинчидан, бу дежавю, ўта қўрқинчли такрор. Агар бу чекловларга индамай рози бўлиб кетаверсак, охирги 27 йилда иккинчи ва учинчи марта бир даҳшатли хатони такрорлашга кўнсак, демак, халқ ва миллат ўлароқ эркин иқтисодиет, очиқ бозор ва ҳуқуқий давлат қуришга ҳақли эмасмиз. Шахсан мен бунга рози эмасман. Рози бўлмайман.