Банк бозорининг 95-98 фоизини назорат этувчи банклар ўзларининг чакана қарздорларига бир томонлама кредит таътиллари тақдим этишди. Сони ҳаддан зиёд кўп ва қайта ишлаш мушкул бўлган жараёнларнинг бир қисми шу билан 2-3 ойга бироз тин олди.
Энди худди шундай тарзда карантин даврида омонатчилар билан боғлиқ масалани ечишга тўғри келади. Тушунарлики, онлайн омонатларда муаммо йўқ ва бўлиши ҳам мумкин эмас. Лекин оффлайн омонат эгалари омонатлар муддати келса, қандай йўл тутиши лозим? Кўчага фақат озиқ-овқат ва дори-дармон учунгина чиқиш мумкин. Банкка ташриф буюриш имконсиз.
Юзага келган шароитда банклар 2 йўлдан бирини тутиши мумкин:
Биринчи вариант: Муддати келган омонатлар муддатлари худди ўша омонат фоиз шартларида 2 ёки 3 ойга бир томонлама қарор билан узайтирилади. Бунда омонатчи муддати узайтирилган омонатини уйдан чиқишга шароит ва имконият бўлган исталган пайтда фоизини йўқотмасдан олиши мумкин бўлади.
Иккинчи вариант: Муддати келган омонатларнинг муддатини узайтириш учун онлайн аризалар қабул қилиш тизими йўлга қўйилади. Бунда омонатчида омонатини қайта расмийлаштириш учун эркин танлов бўлади. Тўғри, ҳуқуқий, техник ва жисмоний жиҳатдан анча мураккаб иш. Лекин эпласа бўлади.
Кредит олган жисмоний шахсларга енгиллик тақдим этган тижорат банклари омонатчиларига ҳам қулайлик ва енгиллик тақдим эта олади. Албатта, бу икки томон учун ҳам манфаатли бўлади.
@the_bakiroo