Марказий банк Бошқарувининг асосий ставкани кўриб чиқиш бўйича асосий мажлиси яна 9 кундан кейин, яъни 2020 йилнинг 23 апрелига режалаштирилган эди. Шунинг учун регуляторнинг бугунги қарори кўпчилик учун, хусусан менга ҳам кутилмаган бўлди. Роппа-роса 40 кун аввалги баёнотда асосий ставка ўзгаришсиз қолдирилгани нархларнинг кутилаётган эркинлаштирилиши ҳамда коронавирус билан боғлиқ бўлган ташқи иқтисодий ноаниқликларнинг кучайиши билан изоҳланган эди. Шунингдек инфляциянинг энг юқори даражаси жорий йилнинг иккинчи чорагида кузатилиши мумкинлиги борасида ташвишлар билдирилган. Тўғри, ўтган 40 кунда нималар рўй бермади, молиявий дунё остин-устун бўлиб кетди, ҳатто қисқа муддатли режаларга ҳам жуда жиддий ўзгартиришлар киритилди. Агар карантин чекловлари яна анча давом этади деб ўйласак, ставканинг туширилмаслиги ва имкон қадар кредитлашни рағбатлантирмаслик, девальвацион ўзгаришларига туртки бўлмаслик мақсадга мувофиқ бўлар эди. Гар девальвацион босим, инфляцион кутилмалар юқори бўла туриб асосий ставка пасайтирилдими, ўта шахсий фикри ожизимча, карантин чекловлари узоқ давом этмаслиги назарда тутилмоқда. Ва тез орада иқтисодиёт эшиклари яна очилади ва ўтган 1 ойлик иқтисодиётни ўчириб қўйиш паузасидаги йўқотишлар жуда фаол компенсация қилинмоқчи. Асосий сигнал шу. Яна билмадим, бошқача изоҳлашим қийин. Эртага 2020 йил 15 апрель куни соат 11:00 да ташкил этиладиган Марказий банк Раиси иштирокидаги онлайн брифингни кутамиз.