Ўта ёмон таассуротлар қолди Биринчидан, тенг диалог эмас, кибрга тўла монолог эшитдик. Иккинчидан, "Бизнес ишлатадиган исталган дастур фискализация қилиш учун интеграция қилиниши керак" деган бузуқ догмадан воз кечилмаган. Масалан, солиқ учетига тааллуқли бўлмаган бошқарув учетига оид дастурлар нега фискализация мақсадида интеграция қилиниши керак, деган саволга жавоб йўқ. Учинчидан, очиқча айтилмаган бўлсада иккита ёмон ишоралар берилди: "Жаримани камайтириш учун, компанияни майдалаб бўлларинг. Жаримани камайтириш учун оборотни камайтиринглар". Яширин иқтисодиёт камайиш ўрнига потираб ўсади. Тўртинчидан, давлатдан ёрдам олмаган, ўғри олигархларга ўхшаб имтиёз олмаган, давлат бир сўм инвестиция тикмаган, лекин Ўзбекистоннинг ўтган 7 йилда ютуқли тарзда ўсган икки соҳасидан бири умумий овқатланиш бизнеси теп-текис жойда иккиланишлар ва хатарларга рўпара қилинди. Бунинг оқибатларини ва товонини Кудбиев ва компания эмас, биз истеъмолчилар тўлаймиз. Бешинчидан, "дўстларга имтиёз, халққа солиқ, бизнесга жарима" тарзида тинимсиз қўлланилаётган икки хил стандартлардан шунақа ҳиссиёт қолмоқдаки, Ўзбекистонда бизнес юритиш учун тадбиркор, айтайлик, монополист, олигарх, цементчи ёки Яндекс бўлиши ва албатта, Ўзбекистон ҳукуматига канали, таниши бўлиши керак.