Янаям чуқурроқ қазилмоқда, лекин газ, нефть ва конденсат қазиб олиш қисқариши тўхтагани йўқ Ўтган кунги ҳисоботда айтилган — қазиш чуқурлигини 4-5 километргача оширилгани статистикада ҳозирча акс этгани йўқ. Агар қоғоздаги захиралар (1,8 трлн.куб) инвентаризация қилиниб, мустақил аудитдан ўтказилиб реалликларга қайтилмаса, чуқурликни 6-7 километргача оширишдан қандай иқтисодий маъно бўлади, прогноз қилиш қийин. Эҳтимолки, янада чуқурроқ қазишдан ютса, бурғулашни ўзиники қилиб олиб ўзлаштираётган "хорижий" "пудратчилар" ютади. Демак, ноябрда газ, нефть ва конденсат қазиб олишнинг қисқариши бир чизиқда давом этган. Ой давомида 3 792,6 млн.куб газ қазиб олинган, бу ўтган йилнинг тегишли даврига нисбатан 433,8 млн.кубга кам. Йил бошидан қисқариш 4,6 млрд.кубга етган. Маълумот учун, Туркманистон олинадиган ва "Россиядан тўғридан-тўғри" импорт қилинадиган" газнинг умумий ҳажми 4,8 млрд.кубни ташкил этиши керак ва бу кутилаётган йиллик қисқариш ҳажмини (5 млрд.куб) қоплай олмайди. Нефть қазиб олиш ҳам камайишдан тўхтагани йўқ. Ноябрда 60,9 минг тонна нефть қазиб олинган, бу ўтган йилнинг ноябрига нисбатан 4,2 минг тонна кам. Йил бошидан буён қисқариш 12 минг тоннага етган. Газ конденсати олиш 100,3 минг тоннагача қисқарган (-7,8 минг тонна). Йил бошидан қисқариш 82,1 минг тоннани ташкил этади. Афсуски, ноябрда бир маромда ўсиб бораётган электр энергияси генерацияси ҳам қисқарган. Ой давомида 6 638,6 млн.кВт.соат электр энергияси генерация қилинган, бу ўтган йилнинг ноябрига нисбатан 93,9 млн.Квт.соат камроқ. Энергетикадаги муаммоларга қарамай, саноат ишлаб чиқаришнинг ўсиши 5,8%дан 6,0%гача тезлашгани эътиборли.