Тўлиқ нақдсиз тўловларга ўтишни уй-жой ва автомобиль савдосидан бошлаш керак Чунки яширин иқтисодиёт манбаи Ўзбекистон шароитида асосан шу икки сегментда жамланган, солиқ тўланмаган даромадлар, тобора кенгайиб бораётган коррупцион оқимлар асосан шу сегментларга йўналтирилади. Сенатдаги бугунги ялпи йиғилишда Бош вазир ўринбосари Жамшид Қўчқоров яширин иқтисодиётга қарши курашишни назарда тутувчи қарор лойиҳаси назарда тутилганини эслатиб кетган. Ҳукумат вакилига кўра, энг юқори яширин иқтисодиёт қурилиш, савдо, хусусан умумий овқатланиш ва хизматлар соҳасида жамланган. Айни шу соҳаларда фақат банк карталари орқали тўловларни қабул қилиш қоидалари киритилиши мумкин. Бу, албатта, иқтисодиётни оқартириш учун ташланган илк қадам бўлади. Лекин тўлиқ нақдсиз ҳисоб-китобларга биринчи навбатда ўтилиши керак бўлган иқтисодий сегментлар бу уй-жой ва автомобиль савдосига оид бўлиши керак (бирламчи бозор ҳам, иккиламчи бозор ҳам). Энг катта долларлашув жараёни ҳам шу кулранг секторни эгаллаб олган.