​Реновация бу "бузиш" баҳона тортволиш эмас Кабинетида Мордор пропагандаси доим ёниқ турадиган ўзбек чиновнигининг калласига кўра, Реновация бу у яхши кўрган "снос". Унингча, мулкдорда ҳуқуқ йўқ, мажбурият бор. Чиновник билан тили ва чўнтаги бир "инвестор" қурувчи нима хоҳласа, шуни қилади. Йўқ бундай эмас. Одамхўр бўлмаган давлатларда Реновация бу уй-жой мулкдорларининг ўз хоҳишлари билан уй-жой шароитларини яхшилаш жараёни ҳисобланади. Реновация дастурига уй-жой мулкдорларининг мутлақ кўпчилик қисмининг очиқ овоз бериш билан маъқуллашлари орқалигина қўшилиш мумкин. Реновацияга мулкдорлар блокловчи улуши қарши бўлса, жараён бошланмайди. Реновация бу бузиб қайтадан қуриш бўлиши шарт эмас, ҳатто авариявий бўлган кўп қаватли уйларни асл ҳолатигача моҳиятини сақлаб қайта тиклаш дегани. Реновацияда зичликнинг ошириш нисобига амал қилинади. Илгари 1000 киши яшаган мавзега 10000 одам яшайдиган "чумолихона" қурилмайди. Реновацияда ижтимоий инфратузилма пропорционал равишда бойитилади. Инвестор ошаетган зичликка мутаносиб равишда мактаб, боғча, поликлиника қуриши керак. Реновацияда инвестор конкурс ва аукционларда аниқланади. Талабгор инвесторлар ўз таклифи билан овоз олиш учун курашади. Қанақадир ҳокимият ё ҳукуматда таниши бор хитойлик ё сингапурлик фойдасига Реновация бўлишига йўл қўйилмайди. Реновацияда бузилган уй жой эвазига олинадиган уй-жой майдони кўпроқ бўлиши, тўланадиган пул товони эса оширувчи коэффициентга боғланиши керак. Бу ва бошқа мезонларнинг ҳаммаси Қонунда акс этиши керак. Ҳурматли ўзбек чиновниклари. Ҳадеб инсон ўғит ва чиқим ҳисобланадиган одамхўр Мордордан кўчирма олавермай, мундоқ бир одам одам ўрнида кўриладиган Германиядан, Польшадан, Эстониядан қандай Реновация ўтказилганини ўрганинг. Зора озгина бўлсаям одамларга юз буриб қайрилишни бошласангиз. Яна бир таъсирчан йўлиям бор, лекин бунинг учун мордорча реновацияни сизнинг кошона ва саройларингиздан бошлашга тўғри келади.