Давлат банклари корпоратив, хусусий банклар чакана ҳисобига депозит базасини ўстирмоқда Апрель ойида банкларнинг депозит портфелининг ўсиши юқори суръатларда давом этган. Ой мобайнида жами депозитлар қолдиғи 5,4 трлн.сўмга ўсиб, 248,6 трлн.сўмга етган. Депозитлар мундарижасида давлат банкларининг маъмурий йўл билан қўлга киритиш мумкин бўлган корпоратив депозитлар, хусусий банкларнинг эса очиқ бозордан курашиб олинадиган чакана депозитлар ҳисобига динамика яратаётганини кўриш мумкин. Ой давомида корпоратив депозитлар 3,2 трлн.сўмга, аҳоли омонатлари қолдиғи эса 2,2 трлн.сўмга ўсган. Ипотекабанк (1 453 млрд.сўм), Ипак йўли банки (805 млрд.сўм) ва Агробанк (773 млрд.сўм) депозит жамғаришда энг фаоллардан бўлган. Гарчи аҳоли омонатлари умумий қолдиғи фаол ўсаётган бўлсада, 13 та банкда чакана депозитлар қолдиғи ё ўсмаган ё қисқарган. Уларнинг орасида бозорда энг юқори ставкада омонатлар таклиф этаётган банклар ҳам борлиги эътиборли.