Жами депозитлар ўсишни бошлаган. Лекин фақат омонатлар ҳисобига Уч ойлик кетма кет қисқаришдан кейин апрелда жами депозитларнинг 2,4 трлн.сўмга ўсиши қайд этилган. Лекин ўсиш фақат аҳоли омонатларининг қарийб 4 трлн сўмга ўсгани ҳисобига юз берган. Корпоратив депозитлар қолдиғи 1,5 трлн.сўмдан кўпроққа камайган. Йил боши билан солиштирганда корпоратив депозитлар қолдиғи 10% атрофида, 14,2 трлн.сўмга қисқарган. Гарчи бирон марта изоҳ берилмаган бўлсада, корпоратив депозитларнинг кескин қисқараётгани фискаль омиллар билан боғлиқлигига ишоралар кўп. Бюджет мувозанати учун ички қарз жамғаришга мойиллик кескин ортган, жойлаштирилган давлат қимматли қоғозлари ҳажми ўтган йилнинг шу даврига нисбатан каррасига кўпайган. Яна бир омил бу яширин иқтисодиёт кўламининг кенгайиб бораётганига бориб тақалади. Адолатсиз солиқ юки тақсимотидан азобланаётган Бизнес ҳисобварақлар орқали эмас, нақдга ишлашга томон чекинмоқда. Корпоратив бозорда "нон йўқлиги" учун банкларнинг депозит учун асосий кураши чакана сегментда кетмоқда. Аввал ҳам ёзганимиздек, бу курашга давлат банклари ҳам қўшилмоқда. Апрелда энг кўп омонат кўпайтирган банклар Агробанк (+535 млрд.сўм), Миллий банк (+493 млрд.сўм) ва Ипотекабанк (+419 млрд.сўм) бўлган. Омонат бозорининг анъанавий лидерлари бўлган, Капиталбанк, Ҳамкорбанк, Тибисибанк ва Анорбанк бу сафар статист вазифасини бажаришган.