Тақиқланган лифт импорти тикланадими? Антимонополия соғлом ақлга чақирмоқда Рақобат қўмитаси томонидан лифт ва лифт ускуналарини импорт қилишда вужудга келаётган муаммолар ўрганиб чиқилган. Айтилишича, 17 та мувофиқлик сертификатларининг амал қилиши тўхтатилганлиги сабабли импортёр корхоналар томонидан бугунги кунда республика ҳудудига олиб келинган лифт ва эскалатор ускуналар омборларда қолиб кетмоқда. Яъни аввал ёзганимиздек, нотариф чекловлар билан тақиқланган лифт импорти муаммоси ҳал бўлгани йўқ. Лекин қўмита Тоғ-кон саноати ва геология вазирлиги ва Вазирлар Маҳкамасига қатор таклифларни киритган: - Ваколатли орган томонидан бекор қилинган 17 та мувофиқлик сертифатини истисно тариқасида тиклаш чораларини кўриш; - мавжуд бўлган синов лабораторияларининг моддий-техника базасини яхшилаш учун(лифт, лифт ускуналари ва эскалаторларни синовдан ўтказиш синов учун зарур бўлган синов миноралари ва асбоб-ускуналарни олиб кириш) чет-эл грант маблағларини жалб этиш чораларини кўриш; - лифтларни синовдан ўтказиш ва мувофиқлик сертификатини бериш бўйича хизматлар бозорига хусусий секторни кенг жалб қилиш чораларини кўриш; - сертификатлаш жараёнида бир шартнома доирасида олиб келинаётган марка ва модели бир хил бўлган лифт товарларини фақатгина бир нусхасини синовдан ўтказиш орқали уларга битта мувофиқлик сертификатини расмийлаштириш амалиётини жорий қилиш. Бу таклифлар вазирлик ва ҳукумат томонидан инобатга олинадими ёки лифт ва эскалатор "ишлаб чиқариш"ни маҳаллийлаштириш баҳона монополлаштириб олган олигархия фойдасига чекловлар давом этадими, вақт кўрсатади.