Газни шимолдан импорт қилаётган Ўзбекистоннинг газ экспорти июнда 24 баробар ошган Июнь ойида 166,3 млн.долларлик газ импорт қилинган бўлса, газ экспорти май ойига нисбатан қарийб 24 баробарига ошиб, 181,5 млн.долларга етган. Бу иқтисодий мазмунга эга бўлмаган парадокс жараён бўйича, табиийки, саволлар туғилади: Экспорт қилаётган эксклюзив чўнтаклар кимлар? Импорт қилаётганлар кимлар? Газ қазиб олиш тушиб бораётган вақтда бюджет ҳисобидан субсидияланаётган газ импортининг қанча қисми экспортга кетмоқда? Импортнинг зарари ўзбекистонликларга, экспортнинг фойдаси олигарх ва чўнтакларга тушмаяптими? Омборлар-чи? Газ омборлари ҳозир ёзда тўлдирилмаса, қишда шимолдаги босқинчиларга яна эланиладими? Ё мақсад ўзи шуми? Газ савдосининг бассейн монополистига айланган UzGasTrade' бирон ҳисоб ё ҳисобот чиқарадими? Ё шонли энергетиклар ва уларнинг олигарх валийлари рухсат бермайдими? Умуман олганда, ташқи савдо бўйча июнь ойида кескин жонланиш рўй берган. Олтин экспорт бўлмаганига қарамай, ўтган йилнинг тегишли ойига нисбатан экспорт 29,1%га (2 136,2 млн.доллар), импорт эса 71,6%га (2 959,0 млн.доллар) ошган. Афсуски, ушбу ўсишнинг бош йўналиши Россия бўлиб қолмоқда. Ташқи савдода ўсиш янги бозорлар ва диверсификация ҳисобига эмас, Россияга қарамлик эвазига ортмоқда. Бу айниқса, шимолликлар мустамлака сиёсатининг асосий қуроли энергия ташувчи товарларда яққол кўринмоқда. Тенденция бевосита қўшниларимиз билан савдонинг, айниқса экспортнинг қисқариши ҳисобига рўй бераётгани эвазига шаклланаётгани жуда ташвишли. Биз 1870 йиллардан 1991 йилгача мустамлакачилик даврида бўлгани сингари метрополияга ташиш, метрополиядан ташиб келишга асосланган иқтисодий ва сиёсий қарамликка қараб юрмаслигимиз керак.