Жазирама июнда газ импорти "кескин ошган", омборлар тўлмоқдами ё чўнтаклар? Аномал иссиқ келган июнь ойида Ўзбекистон 286,3 млн.долларлик газ импорт қилган. Бу 2025 йилнинг ўтган 5 ойида импорт қилинганидан (285,5 млн.доллар) кўпроқ газ дегани. Мазкур ғаройиб статистика қанчалик чиройли кўринмасин, жиддий сўроқ остига қўйилиши керак деган, чунки шимолдан Ўзбекистонга газ импорт қилиш жисмонан чекланган (кунига 9 млн.куб). Июнда эса расмийлар томнидан овоза қилинган нархлардан келиб чиқилса, қарийб 1,8 млрд.куб газ импорт бўлган (ёки кунига 60 млн.куб). Бу эса имконсиз, чунки шимолдан реверс тартибида ишлайди дейилган трубалар бунча ҳажмда, 7 карра кўп газ ўтказиш қобилиятига эга эмас. Газ импорти билан боғлиқ схемалар ҳақида жуда кўп ёзилди. Афсуски, бу бўйича чуқур суриштирувлар ёки тафтиш амалга оширилаётгани йўқ. Газ импорти гонконгдаги воситачилар фойдасига бюджетдан субсидия ундириб ўзлаштиришнинг воситасига айланганми ёки йўқ, бу тўғрида субсидия тақсимловчи ёпиқ бассейн UzGasTrade тарафидан бирон марта изоҳ берилмаган. Дарвоқе, жазирамада газ импорти ошаётганида яхши гумон ҳам йўқ эмас. Импортни кескин ошириб, газ омборларини тўлдиришаяпти деб ўйлаш ҳам мумкин, лекин ўзбекистонликлар ўтган йили ва аввалги йили ҳам шундай яхши гумонга бориб алданганини ноябрь тугамай, тармоқ ва заправкалардан газ узила бошлаганида англашганди. Бу йил ҳам истисно бўлмаса керак. Омборлар тўлмаса, чўнтаклар тўлади. Ҳа, газ импортини ясаётганлар газ экспортиниям тўхтатишмаган, ой давомида 66,9 млн.долларлик газ экспорт қилинган ва йиллик ўлчовда қарийб 1,5 карра ошган (экспорт қилаётган ҳам, импорт қилаётган ҳам, омборчи ҳам ўзаро бегона эмас).