Эртадан метан газнинг потолок нархи бекор бўладими ё самарасиз энергочиновникларнинг қўл бошқаруви давом этадими? Сўзда бозорга ўтиш эълон қилинганига қарамай, 2023 йил октябрдан бошлаб Ўзбекистонда метан газ учун ҳукумат тарафидан белгиланган энг юқори нархлар ўрнатиб келинмоқда. Бугун ярим тунда «метан» газ учун белгиланган энг баланд чакана нархнинг (3 750 сўм) амал қилиш муддати тугайди. Потолок нарх кўтариладими ё тушадими, муддат яна узаядими, энергочиновниклар ҳозирча жим-жит. Аввал ҳам ёзганимиздек, газ масаласида икки ойдан нарига бирон стратегия тугул, тузук-қуруқ режа ҳам йўқ. Энергетиклар ўзларига қулай бўлган бугунги кун комфорти билан яшамоқда ва минг афсуски, бутун Ўзбекистон иқтисодиётини ҳам бугунги кун билан яшашга мажбур қилмоқда. Катта эҳтимол, бундан кейин ҳам шонли энергочиновникларнинг қўл бошқаруви давом этади. Ахир кимга газ бериш, кимга бермасликни бир имзо билан ҳал қилишдан, кўзқарашли лимит тақсимлаш, ёлғончи график тузишдан ёқимлироқ иш борми энергетиклар учун? Эси хуши ва ҳисоб-китоби бор метанзаправкалар эгалари энергоқасам ва энергоёлғонларга ишонмаслик кераклигини ҳис қилиб профилини ўзгартиришга, янги реалликларга мослашишга ҳаракат қилишмоқда. Кимдир мавжуд ёқилғи тармоғига бензин, кимдир пропан қўшмоқда, яна кимдир истиқболдаги имкониятларни электромобилларни қувватлашга ўзгартиришда кўрмоқда. Энергочиновникларнинг кўзи метанда юрадиган автомобиллар истеъмол қилаётган 4-5 млрд.куб газни нима қилиб бўлсаям, бўшатиб олишга қаратилганини сезмаслик мумкин эмас. Чунки бошқа секторлар ва соҳалар узиб, кесиб, қисқартириб бўлинди. Триллионларни совуришаверади, лекин қазиб олиш қисқариши тўхтамайди. Экспорт хос чўнтакларни тўлдираверади. Газ таклифи озайса озаядики, кўпаймайди. Автомобиль эгалари буни инобатга олишлари керак. Куз яқин. Қиш яқин.