Ипотека бозори совумоқда 2022 ва 2023 йилларда ҳаддан ташқари қизиб кетган ипотека бозори жорий йилда учинчи кварталдирки, совушда давом этмоқда. Ўтган 9 ойда 11 726,7 млрд.сўмлик ипотека кредитлари ажратилган. Бу 2023 йилнинг 9 ойига нисбатан 490,3 млрд.сўмга кам дегани. Ипотеканинг қисқариши барча манбалар Молия вазирлиги маблағлари (-193,3 млрд.сўм), банкларнинг ўз маблағлари (-222,0 млрд.сўм) ва Ипотекани қайта молиялаш компанияси (-78,5 млрд.сўм) маблағлари ҳисобидан қисқарган. Ипотеканинг қисқариши, айниқса асосий бозор макони бўлган Тошкент шаҳри ва Тошкент вилоятида яққолроқ сезилган. Тошкент шаҳрида ажратилган ипотека 3 764,6 млрд.сўмдан 3 536,9 млрд.сўмгача, Тошкент вилоятида эса 960,5 млрд.сўмдан 648,7 млрд.сўмгача қисқарган. Эндиликда Тошкент шаҳридан кейинги иккинчи ва учинчи йирик бозорлар бу Самарқанд ва Фарғона вилоятлари. Ипотека олувчилар сони қарийб 20%га, 42 790 нафаргача камайган (-10 653). Битта ипотеканинг ўртача қиймати ўтган йилги 228,6 млн.сўмдан 274,0 млн.сўмгача ёки 19,9%га қимматлаган. Тижорий ипотекани ўртача ставкаси 23,8%дан 25,0%гача кўтарилган, имтиёзли ипотеканинг ўртача нархи ўзгаришсиз 17,5% даражасида қолган. Кам сонли хурсанд қиладиган тенденция ипотека олувчилар орасида ёшлар (18-30 ёшлилар) кўпайгани билан боғлиқ, уларнинг улуши 19%дан 27%гача ўсган.