​Ипотека бозори қисқармоқда, тижорий ипотека фоизи ошмоқда Қизиб кетган кўчмас мулк бозорининг совушни бошлагани фонида 2024 йилнинг биринчи ярим йиллигида ипотека бозорининг қисқариши намоён бўла бошлаган. Жами ажратилган ипотека 6 883,9 млрд.сўмни ташкил этган (ўтган йилнинг шу даврида 7 008,4 млрд.сўм). Ипотека олганлар сони 31 699 нафардан 26 201 нафаргача қисқарган. Лекин битта ипотеканинг ўртача нархи 221,0 млн.сўмдан 262,7 млн.сўмгача қимматлаган. Давлат дастури (3 887,6 млрд.сўмдан 3 671,1 млрд сўмгача) ва Ипотекани қайта молиялаш компанияси (1 086,3 млрд.сўмдан 847,1 млрд сўмгача) маблағлари ҳисобидан ипотека ажратиш камайган. Тижорий ипотека ажратиш эса 2 034,5 млрд.сўмдан 2 365,7 млрд сўмгача кўпайган. Давлат дастури бўйича ипотека ставкаси 17,9% даражасида, ўзгаришсиз қолган бўлса, тижорий ипотеканинг ўртача ставкаси 24,3%дан 25,1%гача кўтарилган. Яна бир эътиборли жиҳат: ўрта ва юқори ёшли аҳоли вакиллари, шунингдек, аёллар ипотека олишни кескин камайтиришган. Бу эҳтимолки, айни шу қатламда даромадларнинг ўсишдан тўхтагани билан боғлиқ. Иккиламчи бозорга ипотека ажратишнинг қисқариши бирламчи бозорга ипотека ажратишнинг қисқаришидан тезроқ юз бермоқда (нархлар ҳам аввал иккиламчи бозорда пастлашни бошлаган). Мазкур тенденциялар йил охиригача ҳам сақланиб қолса керак, зеро, кўчмас мулк ва ипотека бозорининг асосий ўтолдиргичи бўлган даромадларнинг ўсиши секинлашишда давом этмоқда. Иккинчи ярим йилликдан қарз юки тийиб турувчиси ишга тушиши ипотека таклифининг янада қисқариши, табиийки, уй-жойга талабнинг, хусусан инвестицион ва спекуляцион талабнинг пасайишини тезлаштириши мумкин.