Сузувчи ёки эркин сузувчи? Ўзбекистонда валюта курси қайси режимга оидлиги баъзида кичик баҳсларга сабаб бўлади. Маъқулланган "Пул-кредит сиёсатининг 2025 йил ва 2026-2027 йиллар даврига мўлжалланган асосий йўналишлари"нинг дастлабки концептуал лойиҳасига кўра, Марказий банк валюта сиёсатини сузувчи валюта курси режимида амалга оширади. Сузувчи валюта курси инфляцион таргетлаш доирасида самарали пул-кредит сиёсати юритишнинг зарур шартларидан ҳисобланади. Марказий банкнинг ички валюта бозоридаги иштироки нейтраллик тамойилига асосланади. Яъни, Марказий банк интервенциялари йил давомида сотиб олинган монетар олтин ҳажми доирасида амалга оширилади ва алмашув курсининг фундаментал трендига таъсир кўрсатмайди. Сўм алмашув курси ички валюта бозоридаги хорижий валютага бўлган талаб ва таклиф мутаносиблигига нисбатан белгиланади. Марказий банк сўм алмашув курси бўйича ҳеч қандай мақсадни белгиламайди. Бозордаги талаб ва таклиф асосида эркин шаклланувчи алмашув курси ташқи хатарларнинг ички иқтисодиётга ўтишини чекловчи (“shock absorber”) функцияни бажаради ва макроиқтисодий барқарорликни таъминлашнинг муҳим шартларидан ҳисобланади. 2023 ва 2024 йиллар учун сиёсатларда “эркин сузувчи” валюта курси режимида алмашув курси шаклланиши ҳақида гап кетганди.