Давлат раҳбари ўзи таклиф этган содда солиқ механизмини барбод қилишмоқчи Солиқ кодексининг 266, 269, 343, 470 ва 470-1-моддаларига ўзгартириш ва қўшимчалар киритиш орқали 2025 йил 1 январдан бошлаб айланмадан олинадиган солиқнинг қатъий белгиланган ставкалари товар айланмаси 500 миллион сўмгача бўлган тадбиркорлар учун йилига 30 миллион сўм, 500 миллион сўмдан юқори бўлганда – 40 миллион сўм миқдорида белгиланмоқда. Бунда ушбу солиқ режимининг амал қилиш муддати 2026 йил 1 январгача этиб чекланмоқда. Бу жудаям ёмон. Агар антибизнес қонуни кучга кирса, тадбиркорликни бошлаш ва мавжудини оқартиришга бўлган барча мотивацияни ўлдиришга хизмат қилади. Мазкур механизмни шахсан Давлат раҳбарининг ўзи кичик тадбиркорлик оёққа туриши учун таклиф этгани ва жорий қилганиям ўзбек чиновникларини тўхтатиб қолмаётган кўринади. Чиновниклар эшигини тепиб кирадиган катта пулдорлар учун имтиёзлар қоп-қоп, яширин, очиқча, махфий керак бўлса. Кичик бизнеснинг фиғонини ким эшитади? Уни на параламентда, на савдо саноат палатасида ўрни ва вакиллиги бўлса. Қизиқ, ғолиб "либераллар" кичик бизнесни бўғишга, бўйин эгишга ва вақтини ҳисоботларга сарфлашга мажбурлайдиган қонунни маъқуллаб беришармикан? Солиқ кодексининг 343, 470 ва 470-1 моддаларига ўзгартиришлар (матни очиқланмаган) киритилаётганига қараганда, эҳтимолки, айланмадан олинадиган солиқнинг қатъий белгиланган механизмида дивиденд солиғи тўлаш қўшилади ва ҳисоботларни тақдим этиш ҳам мажбурий бўлади. Яъни кичик бизнес учун қулай механизм тугатилишидан аввал унинг афзалликлари барбод қилинади.