​Пропан ўйинлари: Октябрда 8 минг тоннадан ортиқ пропан "сотилмай қолган" Пропан ё йўқ ёки тақчил бўлган октябрда биржа савдоларига чиқарилган 8 180 тонна пропан "сотилмай қолган". Бундай аномалликни тушунтириш учун Рақобат қўмитаси пропани "сотилмай қолган" сотувчилар қирқимида текширувлар ўтказиш керак бўлади. Ўзи бўлганми бу пропан, бўлган бўлса қаерда, Ўзбекистон ичидами, контрактланганми, қайси асосга кўра сотувга қўйилган ё йўқ пропан бўлганми? Нарх потираб ошган сари "сотилмай қолган пропан" ҳам ошиб борганига эътибор қилинг. Минглаб тонна пропаннинг "сотилмаслиги" билан боғлиқ ўйинларнинг абсурдлиги шундаки, эркин бозор шароитида мавжуд товар сотилмаса, эртасига арзонроқ нархда сотувга қўйилиши керак. Масалан, 30 октябрь куни 559 тонна пропан сотилмай қолган, эртасига бошланғич нарх тушиш ўрнига яна ошган. 31 октябрь куни 603 тонна пропан сотилмай қолган, 1 ноябрь куни бошланғич нарх тушиши ўрнига ошишда давом этган. 2 октябрь куни ўртача сотилиш нархи бошланғич нархга нисбатан 2 каррадан кўпга ирғиган ва потолок спред ўрнатилмагунча бошланғич нархга нисбатан ўртача нархлар деярли ҳар куни 1,2 - 1,6 каррадан кўпроққа ошиб бораверган. Биржага қўйилган ва "сотилмай қолган" пропан ҳажми гўёки ошиб борганига қарамай, амалда сотилган пропан ҳажми ҳалигача апрель ойи даражасига чиқмаган. Айнан амалда сотилган пропан ҳажми дефицит сунъий равишда уюштирилганини яққон намоён этади. Нима деб ўйлайсиз, нархни сунъий ошириш билан боғлиқ бу ғирром ўйинлар бўйича олигарх ва монополистларга қарши "пропан иши" очиладими ё яна ҳаммаси "ўрага сичқон тушди, гулдур гуп" бўлиб ёпиладими?