Пропан ҳақида тўқилган маълумот ўғри олигарх ва муттаҳам монополистларни оқлаб бериш учунми? Республика товар-хом ашё биржасининг иддаосига кўра, октябрь ойида биржа савдоларига бир кунда ўртача 1 500 тонна суюлтирилган газ қўйилган бўлса, ноябрь ойининг ўтган даврида ушбу кўрсаткич 2 000 тоннагача етганмуш. Агар биржа пиарчилари айтаётганидек, савдоларга шунча миқдорда пропан росмана қўйилганида, нарх потираб ошармиди? Келинг, пропан билан боғлиқ битимлар ҳажмини солиштирамиз. 7 ноябрь куни 1076 тонна; 6 ноябрь куни 1186 тонна; 5 ноябрь куни 1402 тонна; 4 ноябрь куни 1284 тонна; ва фақат 1 ноябрь куни 2004 тонна. Қани бу ерда ўртача 2000 тонна? Бу қанақа ҳисоб? Ё кунига 2000 тоннадан пропан савдога чиқарилиб унинг ярми сотилмаётганига ўзбекистонликларни ишонтирмоқчимисиз? Ўзбекистонликлар, назарингизда, гўлми? Ё лўхми? Савдога чиқарилган битимлар ортида ўзи қанча реал маҳсулот борлигини қўя турайлик, ўтаётган битимларнинг қанчаси ҳажмни ошириб кўрсатиш учун фиктив эканини балки текшириб кўриш керакдир? Октябрда ўртача 1500 тонна пропан савдога чиқарилганмуш. Бутун ой давомида фақат 6 кун 1500 тоннадан ортиқ ҳажмда битим ўтганини нега айтмайсиз? 1500 тонна ўртачани қандай ҳисобладингиз? Келинг, гўёки "биржага чиқарилган" ва "сотилмай қолган пропан" қайси сотувчиларга тегишли эканини очиқланг. Нарх қайси нуқтага етганида орқага қайтилди ё битимга "ҳеч ким қизиқмай" ўтмай қолди? Ва қайси харидорлар билан бу юз берди? Биржа мустақил, шаффоф ва холис платформа бўлиши керак эмасми? Ё ўзбекистонликларни талаётган олигарх ва монополистлардан иборат бир тўп тўдани оқлаб бериш ҳам вазифангизга кирадими? Биржада суюлтирилган газ нархи сентябрь ойида қайд этилган ўртача нарх (бир тоннаси учун 8 800 минг сўм)дан ҳам паст даражага тушганмуш. Сизларнинг кўзқарашингиздан қаралса, нарх арзонлашган гўё. Нега ўртача нархни октябрь билан ё август билан ёки нархлар потираб оша бошлаган июнь билан солиштирмайсиз? Сизларнинг олдингизда Оруэлл ҳам бошини чангаллаб қолади.