Рақобат қўмитаси кетма-кетликда тарифларини оширган мобиль алоқа, интернет провайдер ва такси агрегатларига қарши иш очадими? Рақобат қўмитаси Бухорода 47 та газ тўлдириш шохобчасида нархлар сунъий равишда оширилганини аниқлаган. Қўмитага кўра, газзаправкалар харажатларнинг ошиши учун иқтисодий асос мавжуд бўлмаган ҳолатда, умумий ташқи омиллар таъсирисиз ва рағбатлантирувчи заруратсиз равишда нархларни бир вақтда ёки кетма-кетликда оширишган. 7−9 декабрь кунлари 1 м³ сиқилган газ учун нарх 4 150 сўмгача кўтарилган (ўша кунларда ҳарорат кескин пасайгани ортидан газ заправкаларда чекловлар ва тақиқлар киритилгани эсингизда бўлса керак). Маълумот учун, 2024 йил 1 августдан метан газ нархларини бозор белгилаши эълон қилинган. Амалда метан гази нархини 3 950 сўмдан оширмаслик бўйича норасмий кўрсатмалар қўлланилади. Албатта, Рақобат қўмитасининг газ заправкалардаги нарх устидан кузатуви яхши, балки агар ҳудуддаги мутлақ кўпчилик заправкалар бир вақтда нархни ошириши юз берган бўлса, тийиб туриб ҳаракатларини олқишлаш керак (муаммолар ва етишмовчилик илдизлари заправкалардан юқорида турувчи маъмурий, монополистик ва коррупциялашган занжирларда эканини унутмаган ҳолда). Лекин мени доим ҳайрон қолдирадигани Рақобати қўмитаси шундай дадил ҳаракатларни мобиль алоқа компанияларига, яқинда бирин-кетин тарифларини қимматлаштирган интернет провайдерларга ёки такси агрегаторларга қарши амалга оширмаслиги. Имтиҳон маркази ва автомактабларда нархлар каррасига ортаётганида худди буюрилгандек чуқур сукут сақлангани ҳақидаку гапирмай қўя қолай. Назаримда, қанақадир тақиқ бўлса керак (ИМҲО). Фалон, фалон, фалон монополист ва олигархларга тегилмайди, улар истеъмолчиларни қанча таласа ҳам, жим туриш керак, лекин анову эгасиз майда чурвақалар билан ишлаётганингларни кўрсатиш учун бемалол шуғулланаверинглар қабилида. Узр, бошқача изоҳлаш қийинда "хонадаги филни кўрмай қолиш" билан боғлиқ бўлаётган ишларни. Қанақадир изоҳи бўлса, бемалол айтиш керак.