Яна қуёшга раҳмат! Ҳаво ҳарорати кўтарилиб, одамларнинг қўли иш ва пул кўришни бошлади, кайфиятлар яхшиланмоқда, бутун қиш осмонга ўрлаган нархлар ҳам барқарорлаша бошлагани сезилмоқда. Эсингизда бўлса, нархлар ошишини газдан узилган иссиқхоналарда етиштирилувчи бодринг мисолида яққол кўринаётгани учун “бодринг индекси” атамасини муомалага киритган эдик Қарангки, охирги бир ҳафтада бодринг 45 минг сўмдан 26 минг сўмгача арзонлаган. Йўқ, иссиқхоналарга газ берилмади, газ экспорти тўхтатилиб, иссиқхоналарга узатилиш бошланмади. Яъни бунда шонли энергетикларнинг заррача алоқаси йўқ. Газсиз уйлар исиб қолди. Бутун қиш газ бўлмаган заправкаларга ҳам газ келди. Қантарилган транспортлар ҳаракатга тушди. Иқтисодий фаоллик тикланди. Бу ўзгаришларнинг ҳаммаси қуёшнинг тафти, беминнат нури, юртимизга илиқ баҳор кириб келгани билан боғлиқ. Яна бир марта бобо қуёшга раҳмат деймиз!