Ҳечдан кўра кеч: Бизнес омбудсман электромобиллар импорти чекловлари бўйича сўров юборди Техник тартибга солиш агентлиги ва UzTest'нинг бир йилдан бери ўтказаётган тийиқсиз ва зараркунанда тажрибалари ва ўзбекистонликларнинг дард-фарёди ниҳоят кимгадир етиб борган кўринади. Ҳа, депутатлар-у, сенаторлар жим, бундан кейин ҳам жим ўтиришади, агар "сизлар ҳам нимадир дейишинглар мумкин" деган топшириқ тушмаса. Шунақа сукунат ҳукм сураётган бир пайтда, ишонмасликларингиз мумкин: Бизнес омбудсман овоз чиқарди. Бизнес омбудсман идораси Техник жиҳатдан тартибга солиш агентлигидан электромобиллар импортидаги чекловлар бўйича тушунтириш беришни сўрамоқда. Ўтган куни бизнес омбудсман матбуот хизмати электромобиллар савдоси билан шуғулланувчи тадбиркорларнинг мурожаатлари, шунингдек, уларнинг ижтимоий тармоқларда амалдаги чекловларни танқид қилувчи постлари ўрганилаётгани ҳақида хабар чиққанди. Қизиғи, тадбиркорларнинг мурожаатлари бир йил аввал пайдо бўлган эди. Нимаям дердик, ҳечдан кўра кеч. Кўрамиз, қанақа жавоб бўларкин. Бизнес омбудсман фақат расмий сўров билан чекланмай, Техник тартибга солиш агентлиги ва UzTest'нинг қилмишларини тафтиш қилишга чақирса бўларди.