Талимаржон станцияси сотилдими? Станцияга илинган 700 млн.долларлик кредитни ким ёпади? Бундан 3 йил аввал Талимаржон иссиқ электр станцияси 300 миллион долларлик устав капиталидаги 80 фоиз улуши учун тўлов (240 млн.доллар) ҳамда илгари станция учун жалб қилинган 700 миллион долларлик кредитларни тўлаш шартларида амирликларнинг Mubadala ва TAQA компанияларига берилгани эълон қилинганди. Ўтган ҳафтада хорижий нашрларда Mubadala ва Абу-Даби Миллий Энергия Компанияси (TAQA) Ўзбекистондаги Талимаржон электр комплексида 875 мегаваттлик газ турбинали комбинирланган циклли электр станциясини сотиб олиш якунлангани ҳақидаги хабарлар пайдо бўлди . Ëзилишича, бунинг учун Talimarjan Power Plant 1 компанияси ташкил этилган ва компания акцияларининг 40 фоизи Mubadala'га, 40 фоизи TAQAга, 20 фоизи эса "Talimarjan Issiqlik Elektr Stansiyasi" АЖга тегишли бўлади (очиқ маълумотларга кўра Talimarjan Power Plant 1 2023 йил 1 мартда 109,7 млн.сўмлик устав капитал билан тузилган ва унга Россиядаги электр станцияларида ишлаган Сергей Тазин раҳбарлик қилади). Ушбу объектни бошқариш учун Talimarjan Operations & Maintenance LLC компанияси ташкил этилиб, унда ҳам улушлар юқоридаги улушларда тақсимланган. Шунингдек, Ўзэнергосотиш Talimarjan Power Plant 1 станциясидан 25 йил давомида электр энергияси кафолатланган тарзда сотиб олинади. Ўзбекистондаги энг йирик иссиқлик электр станцияларидан бири билан боғлиқ мазкур битим ва унинг шартлари ҳақида на Энергетика вазирлиги, на Инвестициялар ва ташқи савдо вазирлиги бирон маълумот тарқатгани йўқ. Тузилган битим бўйича саволлар жуда кўп. Гап 1 700 МВт қувватли бутун Талимаржон станцияси сотилгани ҳақида кетаяптими ёки унинг улкан қарз ҳисобига бир неча йиллардан бери туя гўшти еб, таъмири охирига етмаётган ва ҳатто Давлат раҳбари томонидан қаттиқ танқид қилинган навбати ҳақида кетаяптими, тушуниш қийин. 700 млн.долларлик қарз нима бўлади? Мақсадли ишлатилгани ёки совурилгани текширилиши лозим бўлган мазкур қарз кимнинг бўйнида қолади? Инвесторлар тўлайдими? Ë 3 йил аввалги шартлар бир думалаб ўзгариб кетдими? Гўёки янги станция дейилаётган Talimarjan Power Plant 1 станциясидан 25 йил давомида электр энергиясини қанчадан сотиб оламиз ва нима учун кафолатланган харид шарти қўшилди ўзи?