Номиналига нисбатан 8.6 баробар Ахборот кенгликларида ўтган ҳафта сўнггида пайдо бўлган маълумотларга кўра, Япониянинг йирик корпорациялари эгалигидаги Gojo & Company, Inc молия ҳолдинги Ўзбекистондаги микромолия ташкилотларидан бири – «Renesans микромолия ташкилоти» акциядорлик жамиятининг қўшимча чиқарилган акциялари учун номиналига нисбатан 8.6 баробар кўп пул тўлаб, АЖ нинг 9.8% акциялари эгасига айланган. Битимолди баҳолаши (due diligence) «катта тўртлик»нинг бири — KPMG томонидан амалга оширилганлиги инобатга олинса, Gojo компанияси май ойида рўйхатдан ўтказилган эмиссия доирасида чиқарилган барча акцияларни сотиб олиш орқали бозор иштирокчиларига иккита муҳим ишора бермоқда, дейиш мумкин. Биринчиси, бу — Ўзбекистон банк-молия бозори ва унинг келажагига билдирилаётган ишонч. Ҳукумат ва регулятор сўнгги 7-8 йил давомида Ўзбекистон микромолия бозорини такомиллаштириш йўлида астойдил тер тўкди. Жумладан, соҳани ривожлантириш юзасидан Президентнинг бир нечта қарорлари қабул қилинди, «Нобанк кредит ташкилотлари ва микромолиялаштириш фаолияти тўғрисида»ги Қонун амалга киритилди, кўплаб қонуности ҳужжатлари соддалаштирилиб, соҳа мисли кўрилмаган даражада либераллаштирилди. Натижада, микромолия ташкилотлари сони 2017 йил якунида 30 тани ташкил этган бўлса, бугунги кунга келиб 124 та микромолия ташкилоти Марказий Банкнинг ҳисоб рўйхатидан ўтган. Шунингдек, микромолия ташкилотлари активлари мазкур йиллар давомида 70 баробардан кўпроққа ўсиб, 2025 йил 1 июнь холатига 9,35 триллион сўмни ташкил этмоқда. Иккинчиси, бу — бошқарувга берилган ишонч. Ўзимизнинг қоракўзлар ҳам «сертификатланган Б-корпорация»лар белгилайдиган стандардларга жавоб бера олувчи компанияларни шакллантира олишини, бошқара олишини амалда кўриб турибмиз. Мазкур битимга Renesans ММТ акциядорлари ва менежменти томонидан режали тарзда олиб борилган ишлар самараси сифатида қаралиши лозим. Битимдан хабардор шахсларнинг маълум қилишича, янги даврнинг илк умидбахш 2017 йилидаёқ компанияни ривожлантиришнинг узоқ муддатли режалари ишлаб чиқилиб, амалга тадбиқ этила бошланган. Натижа эса ўзини кўп ҳам узоқ куттирмаган: Renesans Ўзбекистондаги нобанк кредит ташкилотлари орасида биринчи бўлиб хорижий кредит линияларини жалб этишни бошлаган, нуфузли хорижий рейтинг агентлигидан ҳам ижтимоий, ҳам институционал рейтингга эга бўлган илк микромолия ташкилотига айланган, корпоратив бошқарув тамойилларини ҳам биринчи бўлиб жорий этган. Бу битим «оқ қоғоз»дан бошланаётган бизнесга эмас, балки Ўзбекистон микромолия бозорида 18 йилдан буён мавжуд ўз тарихи ва номига эга ташкилот капиталига киритилаётган инвестиция сифатида ҳам алоҳида аҳамиятлидир. Renesans ҳам, Gojo ҳам асосан қишлоқ жойлардаги жисмоний шахсларга, жумладан аёл тадбиркорларга, микро ва кичик бизнесга мослаштирилган ва қулай микромолия хизматларини тақдим этиш ҳамда уларни ривожлантиришга урғу беради. Бу эса Ўзбекистон ҳукуматининг кичик бизнесни қўллаб қувватлаш бўйича сай ҳаракатлари билан ҳамоҳангдир. Умид шуки, митти ва кичик тадбиркорликни молиялашга ихтисослашган ўйинчини Ўзбекистон бозорига кириб келиши микромолия ташкилотлари томонидан даромад яратувчи фаолиятларни молиялашни оширишга янги бир туртки беради.