Банкдан катта микромолия ташкилотлари микромолия банки очишга шошилишмаяпти Ўтаётган ҳафтада Ўзбекистонда биринчи микромолия банки учун лицензия берилди: "TAYYAB FINANCE MIKROMOLIYA TASHKILOTI" АЖ негизида энди "TAYANCH MIKROMOLIYA BANKI" АЖ фаолият олиб боради. Маълумот учун, "TAYYAB FINANCE MIKROMOLIYA TASHKILOTI" АЖ активлари ҳажми бўйича 18-ўринда (77,2 млрд.сўм), кредит портфели (52,7 млрд.сўм) бозордан тезроқ ўсмоқда. Портфели нисбатан анча тоза (NPL 0,8%). Лекин айтганимиздек, "TAYYAB FINANCE MIKROMOLIYA TASHKILOTI" АЖ микромолия ташкилотлари сегментининг йирик иштирокчиси эмас. Микромолия сегментининг 50%дан зиёдини (кредитлар бўйича 56%и) учта гигант Тезкойн, Шаффоф-молия ва Фортуна бизнес микромолия ташкилотлари назорат қилмоқда. Ўнта энг йирик микромолия ташкилоти бозорнинг 75%идан зиёдини эгаллаган (кредитлар бўйича қарийб 80%). 1 октябрь ҳолатига ҳисобга олинса, камида яна 8та микромолия ташкилоти 50 млрд.сўмдан зиёд шаклланган устав капиталига эга, яъни микромолия банкига айланиши мумкин (14та микромолия ташкилотининг жами капитали 50 млрд.сўмдан кўп). Бозор етакчиси Тезкойн активлари ҳозирнинг ўзида камида 8та тижорат банкининг активларидан кўпроқни ташкил этади. Йирик микромолия ташкилотларининг микромолия банкига айланмаётгани асосий сабаби — улар учун шу жорий сегмент мезонлари кенгайиш учун қулайлиги ва афзаллигида бўлса керак. Хусусан, микромолия банкига айлангач, тадбиркорлик фаолияти ва ўзини ўзи банд қилган шахслар учун ажратилган кредитларнинг кредит портфелидаги улуши 70 фоиздан кам бўлмаслиги керак. Бу аксар йирик микромолия ташкилотларининг ҳозирги бизнес модели учун унча жозибадор эмас. Қолаверса, бошқа классик банк операциялари (ҳисоб-китоб, тўловлар ва ўтказмалар) сегментларида рақобат шунчалик юқорики (маржиналлик эса аксинча паст ва пасайиб бормоқда) курашга киришишда маъно йўқдек.