Тўқимачилик саноатида тизимли ислоҳотларга зарурат бор Тўқимачилик саноати — Ўзбекистон иқтисодиётидаги стратегик тармоқлардан бири. Бир неча йиллардан буён экспорт имкониятлари, янги иш ўринлари яратиш, ҳудудларни иқтисодий фаоллаштиришда бу соҳанинг ўрни кучайиб боряпти. Лекин соҳадаги тизимли муаммолар, масалан, кредитга қийин эришиш, ички бозорда талаб ва таклиф мувозанати йўқлиги, хомашё етишмовчилиги кабилар ишлаб чиқарувчиларни қийнаб келаётгани сир эмас. Айни дамда тўқимачилик саноати вакиллари билан бўлиб ўтаётган очиқ мулоқотда айнан шундай муаммолар муҳокама қилиняпти. Бу жараёнда давлатнинг қонунчилик, солиқ сиёсати ва молия инструментларига оид ёндашувларини қайта кўриб чиқиш зарурати борлиги ҳам кўринади. Тўқимачилик кластерларининг самарадорлиги, экспортнинг рақобатбардошлиги ва соҳага хусусий инвестицияларни жалб қилиш каби масалалар ҳам батафсил кўриб чиқилса, очиқ мулоқотнинг реал натижаларига эришиш мумкин. Бундай учрашувлар давлат ва бизнес ўртасидаги мулоқотга ишонч ва барқарорлик олиб келади деб ўйлайман. Лекин ҳар бир мулоқотдан сўнг ишлайдиган ечимлар қабул қилиниши, қарорлар ижрода намоён бўлиши талаб қилинади. Жонли эфирни ушбу ҳаволадан ўтиб томоша қилиш мумкин.