​Гўшт интервенцияси пойтахтда нархларни тушира бошлаган Кеча пойтахт Тошкентда 21,8 тонна арзонлаштирилган гўшт сотилган. Бу кеча савдога чиқарилган гўштнинг 27,6%ини ташкил этган. Энг кўп арзонлаштирилган гўшт Эски Жўва (6 тонна) ва Фарҳод (5,6 тонна) бозорлари расталарига чиқарилган. Шаҳар маъмуриятининг ёзишича, маҳаллий мол гўшти 85 минг сўмдан, импорт мол гўшти 70 минг сўмдан, маҳаллий қўй гўшти 90 минг сўмдан, музлатилган гўшт эса 65 минг сўмдан сотилмоқда (нави, сифати ва суяк таркиби тўғрисида маълумот келтирилмаган). Арзон гўшт интервенцияси кенгайтирилгани ортидан Иқтисодиёт ва молия вазирлигининг кунлик ҳисоботи бўйича ҳам тижорий нархларда бироз пасайиш кузатилган. Хусусан, мол гўшти нархи 73-98 минг сўмдан, 72-96 минг сўмгача арзонлаган. Совутилган импорт мол гўшти 93-95 минг сўмдан 92-93 минг сўмгача тушган. Қўй гўшти нархларида ўзгариш қайд этилмаган. Гўшт нархини чеклашдан кўра, гўшт интервенцияси (ёки пастлаб кетганда гўшт хариди) самарали ва бозор воситаси ҳисобланади. Энди бу воситани фақат раҳбарлар кўзи учун витринага айланган ва бой Тошкентда эмас, камбағал ва қимматчилик туфайли кам гўшт ейдиган ҳудудларда, масалан, Фарғона водийси туманларида ҳам амалга ошириш керак (ўзи энг қиммат гўшт ҳозирда водий вилоятларида, масалан, Ўзбекистон бўйича энг қиммат гўшт Фарғона вилоятида). Ўзбекистонда охирги бир йилда гўшт юқори даражада қимматлаётган (32,9%гача ошган) маҳсулот бўлиб қолмоқда. (Сурат муаллифи Шуҳрат Латипов).