Қишлоқ хўжалиги вазирлиги Ўзбекистонни “дунёнинг гўшт арзон сотиладиган давлатидан бири” деб атаган Вазирликка кўра, Ўзбекистон дунёнинг гўшт энг арзон сотиладиган давлатлари қаторида бўлиб, Марказий Осиё мамлакатлари ичида Қирғизистондан кейинги иккинчи ўринни эгаллайди. Асос ўлароқ, расмийлар хусусан витрина Тошкентдаги “арзонлаштирилган” гўшт расталарини келтирган. Қайд этилишича, Тошкентдаги арзонлаштирилган расталарда 65−75 минг сўмлик гўштни харидорларнинг 15−18%и, 90−95 минг сўмлик “рўзғорбоп гўшт"ни эса 82−85%, 110−130 минг сўмлик суяксиз (лаҳм) гўштни атиги 1−2%и сотиб олади. Вазирлик, сўровлар қачон, қайси методда, нима учун айнан Тошкентда ўтказилганига, “арзонлаштирилган” дейилган гўштнинг шаклланиш манбаи ва схемаларига аниқлик киритмаган. Шунингдек, бошқа мамлакатлардаги гўшт нархлари қимматлигини “кўрсатиш учун” Россияда 1 кг мол гўшти — $10−12, Беларусда — $6−8, Қозоғистонда — $7−11, Тожикистонда — $8−10, Грузияда — $9,5−12, Озарбайжонда — $9,5−12,5 экани келтирилган (тоифалари номаълум). Маълумот учун, Ўзбекистон ўртача 4 доллардан гўшт импорт қилмоқда. Импортнинг жуда катта қисми Беларусь ва Қозоғистон ҳисобига тўғри келади. Уч ойдан буён сўровларда гўшт энг кўп қимматлаган маҳсулот ўлароқ саналмоқда. Ҳатто Иқтисодиёт ва молия вазирлигининг маълумотига кўра ҳам улгуржи бозорда 70 минг сўмлик гўшт қолмаган.