Қирғизистон гўшт экспортига вақтинчалик тақиқни бекор қилгани айтилмоқда Сентябрь бошида Қирғизистон йирик шахли қорамол ва майда чорва экспортига вақтинчалик тақиқ қўйгани маълум бўлганди. Ўзбекистон биринчи ярим йилликда қўшни давлатдан қорамол импортини ўтган йилнинг тегишли даврига нисбатан деярли 11 баробарга оширган эди. Akchabar нашри билан суҳбатлашган Антимонополия хизмати вакилига кўра, гўшт экспортига қўйилган тақиқ бекор қилинган. Нашр бекор қилинган тақиқ қорамол ва майда чорвага ҳам тааллуқли ёки тааллуқли эмаслигига аниқлик киритмаган. Қирғизистон Ўзбекистоннинг шарқий вилоятларини, айниқса водий ҳудудини қорамол (гўшт) билан таъминловчи мамлакат ҳисобланади. Лекин август ва сентябрь ойларида Қирғизистоннинг ўзида ҳам гўшт нархи кескин ошиб кетган. Хусусан, мол гўшти августдаги 570 сомдан (86 минг сўм) 620 сомгача (94 минг сўм) кўтарилган. Иқтисодиёт ва молия вазирлиги маълумотига кўра, Эски Жўва бозорида мол гўштининг ўртача нархи Қирғизистондан анча арзон, 60-70 минг сўмни ташкил этмоқда.