Параламент рекордини янгилади 30 сентябрь куни "Креатив иқтисодиёт тўғрисида”ги Қонун лойиҳаси Қонунчилик палатасида 3 ўқишда маъқулланган. Қонунчилик палатаси сайтида бу тўғридаги хабар 11:13да қўйилган. Агар ялпи мажлис соат 10:00да бошланган бўлса, Қонун ижодкорларимиз 1 соату 13 минут ичида "Креатив иқтисодиёт тўғрисида”ги Қонун лойиҳасидан ташқари яна “Космик фаолият тўғрисидаги”ги қонун лойиҳасини ва ипакчилик тармоғини янада ривожлантиришга қаратилган қонун лойиҳасини ҳам маъқуллашга улгуришган. Қойилмисиз? Ўзи Қонунчилик палатасида ялпи мажлис жисмонан ўтганми, ўтмаганми яна бир аниқлаштириш керак, чунки жонли эфир бўлмаган, депутатларнинг жуда кўп қисми сайлов палов кампаниясида ҳудудларда юришипти. Бу ҳали ҳаммаси эмас! Қуйи палата маъқуллаган қонун шу заҳоти Сенатга элтилган кўринади. Сенат йиғилиши очилиши билан "Креатив иқтисодиёт тўғрисида”ги Қонун кун тартибида кўрила бошлаган. Сенаторлар ҳам қонунни уч ўқишда маъқуллашган. Бунга тахминан 30 минут сарфлашган. Эътиборлиси, мазкур қонун Сенат ялпи мажлисининг эълон қилинган кун тартибида умуман бўлмаган. Шундай қилиб, "Креатив иқтисодиёт тўғрисида”ги Қонунни қабул қилишга Параламентнинг иккита палатаси жами икки соатдан камроқ вақт сарфлаган. Бу мутлақо янги рекорд. Бундан аввалги рекорд 2023 йил май ойида 3 кунда қонун қабул қилиш билан боғлиқ бўлганди. Креативлик бўлса, шунчалик бўладида! Маълумот учун, 2024 йил 2 октябрь куни Тошкентда Бутунжаҳон креатив иқтисодиёт конференцияси очилиши кутилмоқда. Пўрим конференция иштирокчиларини Ўзбек параламентариясининг ўрнатган янги рекорди билан албатта таништириш керак. P.S. Сенат мажлиси 15да бошланган кўринади.